Esta edición do AgoraSón terá como protagonistas a Cibrán García e Chicho do Funk -Ortiga-, que conforman o dúo Boyanka Kostova, pioneiro do trap e o hip hop en galego.

O Servizo de Normalización Lingüística, o sábado 14 de outubro ás 21.00 horas, volve organizar o concerto do AgoraSón outono (co gallo do Día da Biblioteca e para promover a lectura e o emprego de materiais audiovisuais en lingua galega), en colaboración coas Bibliotecas Municipais da Coruña.

Boyanka Kostova toma o nome dunha atleta búlgara que practica halterofilia, un bo exemplo de que a variedade de influencias do dúo santiagués non ten límites. Meten na cocteleira a retranca galega, o folclore rexional e os ritmos tradicionais; engádenlles sons urbanos, contemporáneos e electrónicos, efectos, caixa de ritmos... e o resultado é puro flow rural. Trap de aldea, pero universal. Unha verbena exótica na que os temas se alzan como himnos. Capaces de reinventalo todo, a súa música nace como resposta á súa necesidade de explorar e non repetirse; combinando ideas que se retroalimentan entre si, divírtense xogando cos sons e as rimas e escapan de todos os tópicos. Entre os seus traballos máis coñecidos están o EP Vella Canción Galega e os álbums Nova Canción Galega e Os dous de sempre, entre os que aparecen algúns dos seus temas de máis sona, como "Colacao", "Diego Tristán" ou "Muinheira de interior". Este ano sacaron o seu quinto álbum.

O evento terá lugar no auditorio do Centro sociocultural Ágora o día 14 de outubro ás 21.00 horas.

A asistencia será de balde, mais precisará a recollida previa de invitación nas Bibliotecas Municipais. 

Repartimento de invitacións

Repatiranse as invitacións, ata esgotárense, co préstamo de material en lingua galega (libros, películas, CDs de música etc.) dende o venres 6 de outubro nas bibliotecas municipais no horario de apertura de cada centro.

Faranse dúas quendas de reparto: en horario de mañá e horario de tarde.

• Horario de mañá: a partir das 9.00 h, salvo na Biblioteca de Durán Loriga, que será a partir das 12.00 horas.
• Horario de tarde: a partir das 16.00 h, agás no Punto de Servizo de Mesoiro, que será a partir das 17.30 horas.

Repartiranse dúas invitacións por carné e son sen numerar.