A alcaldesa da Coruña, Inés Rey, e o presidente da Xunta, Alfonso Rueda, mantiveron hoxe unha reunión de traballo cun único asunto na orde do día: o futuro dos peiraos interiores e da fachada marítima coruñesa. O encontro, solicitado pola rexedora para avanzar na integración dos espazos portuarios na cidade, serviu para poñer en común o interese das partes en avanzar nun asunto que, segundo a alcaldesa, "é un proxecto de cidade que transcende a un mandato e á propia cidade e é relevante para o futuro de Galicia".

O encontro, realizado en San Caetano, desenvolveuse nun clima de cordialidade, marcado pola boa sintonía e polo interese de ambas as partes de avanzar no proxecto de integración. "Ábrese unha nova etapa de colaboración interadministrativa", indicou a alcaldesa.

Rey e Rueda acordaron deixar o debate sobre o futuro do porto "fóra da contenda política", buscando a forma de avanzar de xeito coordinado e sen trabas. Ambas as partes selaron o que Rey cualificou como "pacto de Estado" para avanzar sen atrancos no futuro do porto. Nesa liña, a alcaldesa anunciou que convocará a todas as partes implicadas na fachada marítima este mesmo mes de maio en María Pita, no mesmo escenario no que a rexedora xuntou a todos os actores o 23 de febreiro do 2021, o primeiro encontro realizado en 17 anos de todas as partes implicadas.

A vontade do Goberno municipal, compartida pola Xunta, é avanzar ao longo deste mandato na integración e apertura do porto, dando pasos firmes que permitan a maior transformación urbanística da cidade en décadas, transformación que se levará a cabo en terreos que seguirán a ser públicos e que deberá facerse baixo os criterios da maior calidade urbana e da creación de novos servizos para a cidadanía. Tanto Rey como Rueda dan por superados os convenios asinados no 2004, coincidindo en que é preciso un novo marco regulador para os terreos portuarios.

Rueda, ademais, amosou o seu compromiso de traballar da man do Concello no desenvolvemento da reurbanización dos Cantóns, a denominada Fase Cero da integración portuaria, ao representar o dito espazo a porta de entrada aos peiraos interiores.